შორენა მარსაგიშვილი

 

დეკემბერში 8 წელი შესრულდება თემირლან მაჩალიკაშვილის მკვლელობიდან. მიუხედავად იმისა, რომ ამ სისხლიან სპეცოპერაციასთან დაკავშირებული მაღალი თანამდებობის პირები სამსახურებში აღარ არიან, ზოგიერთი დაჭერილიც კია, თემირლანის ოჯახი სამართლის პოვნას ვერ ახერხებს.

 

არის თუ არა საქმეში რაიმე სიახლე? აქვს თუ არა მხარდაჭერა მალხაზ მაჩალიკაშვილს სხვა შვილმოკლული მშობლებისგან? რატომ ჭირს სიმართლის დადგენა? ვინ აუმხედრა პანკისის ხეობა ვახა მაჩალიკაშვილს? რა აქვს პოლიტიკოსებს თავში ავარდნილი? _ ამ თემების შესახებ „ქრონიკა+“-ს ესაუბრება მალხაზ მაჩალიკაშვილი:

 

_ ბატონო მალხაზ, დიდი ზარზეიმით გვაცნობეს, რომ ბუტა რობაქიძის საქმეზე სასამართლომ 7 წელი მიუსაჯა მაშინდელ შს მინისტრ ირაკლი ოქრუაშვილს. საუბარია 21 წლის წინათ მომხდარ შემთხვევაზე. დეკემბერში თქვენი შვილის მკვლელობიდან 8 წელი სრულდება და ამ საქმეშიც ხომ არ არის რაიმე სიახლე?

_ საქართველოში შერჩევითი სამართალი რომ არის, ამაზე ყველა ვსაუბრობთ. მაგრამ ამ შეფასებას არ ვეთანხმები და ვიტყვი, რომ საქართველოში ზედმეტად შერჩევითი სამართალია. ბუტა რობაქიძის მკვლელობდან 21 წელი გავიდა. წინა ხელისუფლების დროს არაერთი შვილი მოუკლეს მშობლებს. შვილები მშობლებისთვის სამყაროზე ძვირფასია და ყველა მათგანის ტკივილი კარგად მესმის. რობაქიძის საქმეზე ოქრუაშვილისთვის ახლა 7 წლის მისჯა არის ძალიან საეჭვო და ბევრ კითხვას აჩენს.

„ქართული ოცნება“ ხელისუფლებაში, ფაქტობრივად, ამ გახმაურებული მკვლელობების ფონზე მოვიდა და წლების განმავლობაში არაფერი გააკეთა ამ საქმეების გამოსაძიებლად. ეს საქმეები მხოლოდ მაშინ ახსენდებათ, როცა ძველი ხელისუფლების რომელიმე წარმომადგენელი მათ პრობლემებს უქმნის. შვილმოკლული მშობლებიც მეტ-ნაკლებად იქცნენ ამ ხელისუფლების პროპაგანდის ნაწილად. 20 და 21 წლის წინათ ჩადენილ მკვლელობებზე დღემდე აქტიურად საუბრობენ და არანაირ სოლიდარობას არ იჩენენ იმ მშობლების მიმართ, რომლებსაც ამ ხელისუფლების დროს მოუკლეს შვილი.

ძალიან მაინტერესებს, რატომ მიუსაჯეს ოქრუაშვილს მაინცდამაინც ახლა ამ საქმეზე შვიდი წელი? ძალიან კარგად მახსოვს, როგორ უთხრა ტელევიზიების წინ ოქრუაშვილმა ბუტა რობაქიძის მამას: ჩვენ დავსაჯეთ, ვინც შენი შვილი მოკლა და თუ კიდევ გინდა დასჯა, იარაღს მოგცემ და შური იძიეო. ეს ერთგვარი ვაჟკაცური სიტყვა იყო. ჩემთვის ამ ხელისუფლების წარმომადგენლებს მსგავსი არაფერი უთქვამთ. დამნაშავეების დასჯაზე არაფერს ვამბობ. ისინი პასუხსაც კი არ მცემენ. კიდევ ვსვამ კითხვას, _ ადრე რატომ არ მოეთხოვა ამაზე პასუხი ოქრუაშვილს? იყო პერიოდი, როცა ის „ქართული ოცნებისკენაც“ გახლდათ.

_ მიხეილ სააკაშვილი ამბობს, რომ მისი ჩვენების საფუძველზე ზის ციხეში. ოქრუაშვილს სააკაშვილის წინააღმდეგ მძიმე ჩვენება აქვს მიცემული.

_ ასე იყო. ვიდრე ეს კაცი „ოცნების“ მხარეს იდგა, ეს ბინძური ხელისუფლება მის წინააღმდეგ ხმას არ იღებდა. გავიდა დრო და, ჩვენი არ იყოს, ოქრუაშვილიც მიხვდა, რომ ეს „ქართული ოცნება“ კი არა, ნამდვილი რუსული რეჟიმი და მახინჯი სისტემაა, რომელიც უნდა შეიცვალოს. როგორც კი ხმა ამოიღო ამათ წინააღმდეგ, ადგნენ და 7 წელი მიუსაჯეს. მანამდე „გავრილოვის ღამეზე“ დააკავეს. რობაქიძის საქმე ხანდაზმულობაში უნდა გადასულიყო. ამიტომ ეს არის პოლიტიკური განაჩენი და არანაირი საერთო მას სამართლიანობასთან არ აქვს. ვინც თავისი შვილის სულით ვაჭრობს, იმას დაექცეს ოჯახი, მნიშვლელობა არ აქვს, ეს მე ვიქნები თუ სხვა.

_ წინა ხელისუფლების დროს მოკლული შვილების მშობლები ვახსენეთ. რომელიმე მათგანმა თუ გამოხატა თქვენი ოჯახის მიმართ თანაგრძნობა?

_ გასვენებაში ჩემთან ჩამოვიდა სოსო რობაქიძე და დიდი მადლობა მას ამისთვის. სხვა არავინ გამოჩენილა _ არც დასაფლავებაზე და არც მას შემდეგ. არადა, ჩვენ ყველას ერთი ტკივილი გვაქვს და ამ ტკივილს შვილის სიკვდილი ჰქვია. ძალიან ბევრი მწერს პირადში, რატომ დგახარ „ნაცებისა“ და ოპოზიციის გვერდითო. აინტერესებთ, რატომ არ ვდგავარ იმ მშობლების გვერდით, რომელთა შვილებიც წინა ხელისუფლებამ მოკლა. მაშინ მე დავსვამ ასეთ კითხვას: წინა ხელისუფლების მიერ მოკლული ბავშვების მშობლები მე რატომ არ დამიდგნენ გვერდით და რატომ არ შეეწინააღმდეგნენ „ქართულ ოცნებას“? ის მშობლები რომ ჩემ გვერდით დამდგარიყვნენ და დამხმარებოდნენ დამნაშავეების დასჯაში, ქუჩაში არ გავიდოდი. ჩემი შვილის მკვლელების დაკავება ამ ადამიანებს არ მოუთხოვიათ და რანაირად დავდგე მათ გვერდით? თან ისინი „ქოცებთან“ არიან შეკრულები და მათ ყველა ქმედებას ამართლებენ.

_ დეკემბერში 8 წელი სრულდება თქვენი შვილის მკვლელობიდან და ამ საქმეში რაიმე სიახლე ხომ არ არის?

_ არაფერი სიახლე არ არის. არც მე მიჭერენ და არც _ მკვლელებს. ეს საქმე თაროზეა შემოდებული. თქვენ ხომ ხედავთ, რომ „ქართულ ოცნებას“ თემირლან მაჩალიკაშვილის საქმის ხსენეაც კი არ სურს. იმედი აქვთ, რომ გავა დრო და თავისთავად ჩაიკარგება ეს ამბავი. იმის იმედიც აქვთ, რომ იქნებ, მალხაზ მაჩალიკაშვილიც ვინმემ მოკლას. ამათ გაყინულ ტვინში სხვა კი არაფერი იხარშება. მე მაინც იმედი მაქვს და მჯერა, რომ ყველაფერი ღმერთის ნებაა და ღმერთის ნებით ჩემი შვილის საქმეზეც დადგება სამართლიანობა.

_ თქვენი ოჯახის ტრაგედიასთან დაკავშირებული პირები ახლა თანამდებობაზე აღარ არიან: გოგაშვილი საერთოდ დაჭერილია; ვახტანგ გომელაური გაუშვეს მინისტრობიდან და ამბობენ, რომ მასზეც კომპრომატებს აგროვებენ. მათი წასვლის შემდეგ მაინც ხომ უნდა ყოფილიყო საქმეში წინსვლა?

_ ნორმალურ ქვეყანაში რომ გვეცხოვრა, ეს საქმე მაშინვე იქნებოდა გამოძიებული. მე „ქართულ ოცნებას“ რომ დავუდგე გვერდით და მათი მხარდამჭერი განცხადებების კეთება დავიწყო, გარწმუნებთ, მაშინვე დაიჭერენ დამნაშავეებს. ამ საქმესთან დაკავშირებული პირების ნაწილი გაგდებულია. მათზე საქმეებიც არის აღძრული, მაგრამ თემირლანის მკვლელობაზე პასუხს არავის სთხოვენ. ჩემს საქმესთან დაკავშირებით ჯაჭვია შეკრული და მისი გაწყვეტა ძალიან ძნელია.

_ რა ჯაჭვზე საუბრობთ?

_ ეს არის პროკურატურა, სასამართლო, პარლამენტი. მთელი მთავრობა ამ საქმეზე ერთ პოზიციაზე დადგა. არავის აწყობს საქმის გამოძიება. ერთმანეთს ხელს აფარებენ და ყველა შესაბამისად დამნაშავეა. ერთმანეთს ხომ არ დაიჭერენ? მაგრამ თუ მე „ქართულ ოცნებას“ საჯაროდ დავუჭერ მხარს, მაშინ სიმართლეს იტყვიან და რამდენიმე პირს დააკავებენ. ძალიან მინდა, რომ ჩემი შვილის მკვლელები დაისაჯონ, მაგრამ ამ ხელისუფლებას გვერდით არ დავუდგები. მათ ჩემი შვილი მოკლეს. სიმართლეს მაინც დავადგენ, ადრე თუ გვიან დამნაშავეები პასუხს აგებენ. იმაზეც აგებენ პასუხს, ჩემს მოკლულ შვილზე რა სიბინძურეებიც წერეს და ილაპარაკეს.

_ თქვენი შვილის მიმართ ააგორეს შავი პიარი, მაგრამ საზოგადოებამ არ მიიღო მათ მიერ შემოთავაზებული ვერსიები. არავინ დაიჯერა, რომ თქვენი შვილი ტერორისტი ან ტერორისტებთან კავშირში მყოფი პირი იყო. ჩვენი მოსახლეობა იოლად ეგება ასეთ პროპაგანდას, თემირლანის შემთხვევაში კი სხვანაირად მოხდა. ამას რით ხსნით?

_ რაკი ეს თემა ვახსენეთ, მინდა ვისარგებლო შემთხვევით და დიდი და გულითადი მადლობა გადავუხადო საქართველოს იმ მოქალაქეებს, რომლებიც გვერდით დამიდგნენ და არ დაიჯერეს ჩემი თემირლანის ტერორისტობა. ეს ჩემთვის ძალიან ბევრს ნიშნავს. მათმა ასეთმა დამოკიდებულებამ მომცა ძალა, რომ მებრძოლა. მათი ასეთი დამოკიდებულება მაძლევს იმის იმედს, რომ ადრე თუ გვიან დამნაშავეები დაისჯებიან. ჩვენი მოსახლეობა ძალიან შეგნებულია და ამიტომ არ მიიღო ეს სიბინძურე. ამას დაუმატეთ ისიც, რომ თემირლანის საქმე ძალიან თეთრი ძაფით იყო შეკერილი. სულელიც კი მიხვდებოდა, რომ იქ ყველაფერი ტყუილი ეწერა. საქმე გააფუჭეს და შეთითხნეს.

_ დანარჩენი საქართველოსგან განსხვავებით პანკისის ხეობაში იყო ცოტა სხვანაირი დამოკიდებულება, მაგრამ მგონი, ახლა ისინიც აღარ ფიქრობენ ისე, როგორც მკვლელობის პირველ თვეებში ლაპარაკობდნენ.

_ ხეობაში ისევ მძიმედ არის საქმე. ძალიან გული მწყდება, რომ ჩემს მშობლიურ მხარეში ასეთი დამოკიდებულებაა. წესით, იქ არ უნდა დაეჯერებინათ ეს სიბინძურე. იქ ყველაზე კარგად გვიცნობდნენ ჩვენ და ასე არ უნდა მომხდარიყო, მაგრამ მოხდა და რას ვიზამთ.

_ რატომ მოხდა ასე? კარგად იმუშავა იქ სპეცსამსახურებმა თუ რაიმე სხვა ამბავია?

_ სუს-ის ხელწერა და მუშაობაა. იქ ჩემი ოჯახის წინააღმდეგ ძალიან კარგად იმუშავეს სპეცსამსახურებმა. სხვა ხელისუფლებაც ასე მოიქცეოდა. სპეცსამსახურებს როცა თავისი დანაშაულის გადაფარვა უნდათ, ასე იქცევიან: მსხვერპლს უგორებენ შავ პიარს და ხალხს აჯერებენ, რომ ის დამნაშავე იყო, წინააღმდეგობა გაწია და ათასი უბედურება თუ სიბინძურე.

ჩვენს ოჯახში ჩატარებულ საშინელ სპეცოპერაციას მთელ საქართველოში არნახული ხმაური მოჰყვა. ყველა ამას აპროტესტებდა. სიტუაციის გამოსასწორებლად პანკისში დაიწყეს ისეთი ხალხის მოძებნა, რომელიც ჩემი ოჯახის წინააღმდეგ შავ პიარს ააგორებდა. მოძებნეს ისეთებიც, რომლებიც ამ სიბინძურეს დაიჯერებდნენ და მათთან იმუშავეს ძალიან სერიოზულად. ძირითადად „ქართული ოცნების“ მხარდამჭერებზე იმუშავეს.

_ პანკისის ხეობაში ბევრი მხარდამჭერი ჰყავს „ქართულ ოცნებას“?

_ ჰყავს. „ქართულ ოცნებას“, ძირითადად, რეგიონებში უჭერენ მხარს. ამ მხრივ გამონაკლისი არც პანკისის ხეობაა.

_ „ოცნების“ მხარდაჭერის მიუხედავად, მაინც მეგონა, რომ პანკისელები თქვენს მხარეს იქნებოდნენ. ქისტებს ერთიანობა ყოველთვის ახასიათებდათ.

_ ბევრი დამიდგა გვერდით, მაგრამ ბევრმა ზურგი მაქცია. ძირითადად „ქართული ოცნების“ მხარდამჭერებმა მაქციეს ზურგი.

_ ეს ზურგის შექცევა როდის მოხდა, მკვლელობისთანავე, თუ მას შემდეგ, რაც აქციებზე მოხვედით და თქვენ გვერდით დადგა ოპოზიცია?

_ თავიდანვე მაქციეს ზურგი. მათთან კარგად იმუშავეს სპეცსამსახურებმა. ესენი არიან „ქართული ოცნების“ მხარდამჭერები. დღეს ვინც პანკისის ხეობაში „ქართულ ოცნებას“ უჭერს მხარს, ყველა არის მედროვე. ამას სრული პასუხისმგებლობით გეუბნებით. ეს მედროვე ადამიანები ჩემ წინააღმდეგ განაწყო და აამხედრა სუს-მა. პირდაპირ ვერაფრის თქმას ვერ მიბედავდნენ, მაგრამ ზურგს უკან ჭორაობდნენ, სიბინძურეებს ავრცელებდნენ. ჩათვალეთ, რომ ტყვიას მესროდნენ ზურგში. აბა, თუ ყოჩაღები არიან, პირში ეთქვათ რამე. საკადრისს პასუხს მიიღებდნენ. ძალიან კარგად იმუშავა სუს-მა მაშინ პანკისში. ფულიც დაარიიგეს და ზოგს სამსახურიც დააწყებინეს. მელანი არ ეყოფა იმის დაწერას, რაც მაშინ პანკისში სუს-მა იკადრა.

_ მედროვეებიო, ახსენეთ და, ალბათ, ხელისუფლება რომ შეიცვლება, სხვა პოზიციას დაიკავებენ და მოჰყვებიან, რა დავალება მიიღეს.

_ ალბათ, მოჰყვებიან. მედროვე, როგორც კი ხელისუფლება იცვლება, მაშინვე ახალი ხელისუფალის ნავში ჩახტება. თუ დაინახავენ, რომ ახალი ხელისუფლებისთვის თემირლანის საქმის გამოძიება მნიშვნელოვანია, იმაზე მეტს მოჰყვებიან, ვიდრე საქმეს სჭირდება. მე მათ გარეშეც ვიპოვი სამართალს. სამართალი აუცილებლად დადგება. ყველას დიდი მადლობა, ვინც ამდენი წელია გვერდით მიდგას და სიმართლის დადგენას ჩემთან ერთად ცდილობს.

_ თქვენი შვილის საქმის გამოძიება, დიდი ალბათობით, ხელისუფლების შეცვლის შემდეგ მოხდება. ხელისუფლების შეცვლა ჯერ ვერ ხერხდება, არადა, ერთი წელია, პროტესტი გრძლდება. თქვენი აზრით, ეს უწყვეტი პროტესტი მივა რამე შედეგამდე, თუ ამაოდ ჩაივლის ამ ხალხის ამდენი ხანი გარეთ დგომა და თავდადება?

_ იმ ხალხის მიმართ, ვინც ამდენ ხანია, ქუჩაში დგას, მინდა, პატივისცემა გამოვხატო. მინდა, მათ ვუთხრა, რომ ეს ბრძოლა აუცილებლად გამოიღებს შედეგს. რაღაც შედეგი უკვე არის. ხელისუფლება კი ამბობს, რომ დათმობაზე არ წავა, მაგრამ, ძალიან კარგადაც წავა. შეიძლება ითქვას, რომ უკვე წავიდა კიდევაც რაღაც დათმობებზე.

_ რა დათმობებზე წავიდა? 

_ ეს დათმობები უკვე არის, სიმართლეს გეუბნებით. უამრავი ნაცნობი მყავს და რაღაც ინფორმაციები ჩემთანაც მოდის „ქართული ოცნების“ კულუარებიდან. საქართველო პატარა ქვეყანაა და აქ დიდხანს არაფერი დაიმალება. „ქართული ოცნება“ ძალიან შეწუხებულია ქვეყანაში არსებული ვითარებით.

_ რაზე ეტყობა, რომ შეწუხებულია?

_ დამიჯერეთ, ეს ამბავი მათ ძალიან აწუხებთ. ერთია, როგორ იქცევიან გარეგნულად და მეორეა, რას ფიქრობენ და რას გრძნობენ. უკვე ბევრი პრობლემა შეექმნათ და მომავალში ეს პრობლემები კიდევ უფრო გაიზრდება. დათმობებზე უკვე ფიქრობენ და მალე ეს საჯარო გახდება. გამოვიდა ინფორმაცია, რომ „ქართული ოცნება“ ახალ საპარლამენტო არჩევნებს ჩანიშნავს. ღრმად ვარ დარწმუნებული, ასეთი არჩევნები ნამდვილად ჩატარდება და ეს იმ უწყვეტი პროტესტის შედეგია, რომელიც ერთი წელია, გრძელდება. ბევრს ეცადა ხელისუფლება, მაგრამ ვერ ჩაახშო ეს საპროტესტო განწყობები. ხალხს აღარც დარბევა აშინებს და აღარც დაჭერები.

ვადამდელი საპარლამენტო არჩევნები რომ იქნება, ამაზე ის კანონიც მეტყველებს, რომელსაც ემიგრანტების წინააღმდეგ იღებენ. 2012 წლის შემდეგ „ქართულმა ოცნებამ“ საზღვარგარეთ ყველა არჩევნები წააგო. იციან, რომ წააგებენ შემდეგ არჩევნებსაც და ამიტომ წაართვეს ამ ხალხს არჩევნებში მონაწილეობის უფლება. ვადიანი არჩევნები საქართველოში 2028 წელს უნდა ჩატარდეს. ვადამდელზე რომ არ ეფიქრათ, ამ ცვლილებებს 2028 წლის დასაწყისში მიიღებდნენ. ამათ ახლა მიიღეს და ეს იმას ნიშნავს, რომ ემზადებიან ვადამდელისთვის და თან მთელი სერიოზულობით.

ვადამდელი არჩევნებისთვის სამზადისს ვუკავშირებ ოპოზიციის ლიდერების ასეთ მასობრივ დაკავებას. ფაქტობრივად, ლიდერი აღარ დატოვეს გარეთ. პოლიტიკიდან წასული ოქრუაშვილი ციხეში ჰყავდათ ისედაც და კიდევ შვიდი წელი მიუსაჯეს. ასევე დაუმატეს სასჯელები სხვა ლიდერებს, რომლებიც პატიმრობაში არიან. უნდათ, არჩევნები ისე ჩაატარონ მათ გარდა ასარჩევი აღარავინ იყოს. შეწუხებულები არიან და ცდილობენ, როგორმე მსოფლიოს დაუმტკიცონ, რომ ისინი ლეგიტიმურები არიან.

დღეს ბევრი ფიქრობს რომ 4-მა ოქტომბერმა ოპოზიციას ძალიან გაუფუჭა საქმე. ამ მოსაზრებას კატეგორიულად არ ვეთანხმები. ეს ასე ნამდვილად არ არის და ყველას მოვუწოდებ, დასკვნების გამოტანას ნუ იჩქარებენ. სინამდვილეში, საქმე სულ სხვანაირადაა. 4 ოქტომბერს მთელმა მსოფლიომ დაინახა, რომ საქართველოში ეს ხელისუფლება აღარ უნდათ. ძალიან ბევრი ხალხი იყო გარეთ გამოსული.

_ და ბევრი ადამიანი დაიჭირეს ამ აქციაზე, მათ შორის, 5 ლიდერი.

_ დაკავებით სხვა დროსაც იჭერენ ხლხს. ეს „ქართული ოცნების“ ბუნებაა. სხვანაირად არ შეუძლიათ, სხვანაირად ვერ შეინარჩუნებენ სკამებს. 4 ოქტომბერს მთავარი ხალხის სიმრავლე იყო. იმ დღეს „ქართულმა ოცნებამ“ კიდევ ერთხელ ნახა, რამდენ ადამიანს სძულს ის. გაცილებით ბევრს ეზიზღება ეს პარტია, მაგრამ გარეთ ყველა ვერ გამოვა. ამ ხალხმა 4 ოქტომბერს ქვეყანაში არსებული სიმახინჯე და ნაძირალობა გააპროტესტა.

მინდა, აღფრთვანება გამოვხატო იმ ბავშვების მიმართ, რომლებიც ამ აქციებში მონაწილეობენ. არ ვიცი, წარმოდგენა არ მაქვს, ამდენ რამეს როგორ უძლებენ. რა არ გამოატარეს: საშინელი დარბევები, წამება, ციხე... მაინც აგრძელებენ ბრძოლას, რადგან კარგ ქვეყანაში სურთ ცხოვრება. ისეთ ქვეყანაში უნდათ ცხოვრება, სადაც დედებს შვილებს არ მოუკლავენ და თუ რაიმე ასეთი მოხდება, დამნაშავეები აუცილებლად აგებენ პასუხს. ძალიან იმედიანად ვარ, ასეთ ახალგაზრდებს რომ ვუყურებ. ისინი ნამდვილად იმსახურებენ უკეთესს მომავალს. უკეთესს მომავალს იმსახურებს ჩვენი საქართველოც.

საქართველოს უკეთესი მომავლისთვის პროტესტი მანამდე უნდა გაგრძელდეს, ვიდრე ეს ხელისუფლება არ დათმობს. ხელისუფლება უკვე თმობს და ეს პროტესტი მათ საბოლოოდ დააანგრევს, ამაში ღრმად ვარ დარწმუნებული. ის ხალხი, რომელიც უწყვეტი პროტესტის ნაწილია, შეუძლებელს აკეთებს. ადამიანების რესურსი უსაზღვრო არ არის და ცუდი არ იქნება, თუ მათთან ერთად სხვებიც დადგებიან. „ქართულ ოცნებას“ ბევრი მოწინააღმდეგე ჰყავს და ყველა უნდა გამოვიდეს გარეთ, ხანდახან მაინც.

_ ისევ არჩევნების თემას დავუბრუნდეთ. როგორც თავად თქვით, „ქართული ოცნება“ უკვე ემზადება ვადამდელი არჩევნებისთვის. ოპოზიცია, ფაქტობრივად, არ გვყავს და არის რეალური საფრთხე, რომ ეს არჩევნები ისევ „ქართულმა ოცნებამ“ მოიგოს, ოღონდ ამჯერად ნაკლები გაყალბების გარეშე, რაც მათ ლეგიტიმაციას კითხვის ნიშნის ქვეშ აღარ დააყენებს.

_ ნამდვილად არსებობს იმის საფრთხე, რომ ამ არჩევნებს „ქართული ოცნება“ მოიგებს. აუცილებლად მოიგებს, თუ ოპოზიციამ არ იმოქმედა. 2024 წლის საპარლამენტო არჩევნების წინ პანკისში მოსულები იყვნენ დამკვირვებლები. ერთმა მკითხა, _ რას ფოქრობთ, არჩევნებს მოიგებს თუ არა ოპოზიციაო? მე ვუთხარი, _ ელექტრონული არჩევნები საქართველოში ახალი ხილია, ამ ხილს „ქართული ოცნება“ ისე გემრიელად ჩაკბიჩავს, რომ ვერავინ ვერაფერს მიხვდება. ისე აგიხდეთ ყველაფერი კარგი, როგორც ეს ახდა.

ოპოზიცია ელექტრონულ არჩევნებს ზეიმით შეხვდა. მოსახლეობას არ აუხსნეს, რა და როგორ უნდა გაეკეთებინა. არც თავი დაიზღვიეს შესაძლო გაყალბებისგან. ძალიან დიდი შეცდომა დაუშვეს და შედეგად მივიღეთ დღევანდელი რეალობა. პოლიტიკოსებმა და არასამთავრობოებმა ზოგჯერ სხვა კატეგორიის ხალხსაც უნდა მოუსმინონ, თუ როგორ უნდა მოიქცნენ, რომ არჩევნები არ გაყალბდეს. მას შემდეგ ბევრი რაიმე შეიცვალა. ახლა ბევრი ამბობს, არჩევნებით ხელისუფლების ცვლა არ გამოვაო. მე ვამბობ, რომ სწორად თუ იმოქმედებენ, გამოვა, თან კარგად გამოვა.

_ თქვენ თქვით, რომ ზოგჯერ ოპოზიციამ ხალხს უნდა მოუსმინოს. არ უსმენს ოპოზიცია ხალხის ხმას?

_ ზოგჯერ არა. პირდაპირ ვიტყვი, ოპოზიციას თავში ჰქონდა რაღაცა ავარდნილი. ზოგი ვის ემსახურებოდა ზოგი _ ვის. საიდან უბერავდა ქარი, კაციშვილი ვერ გაიგებდა. ათასი უბედურება გამოიარეს და რაღაც დასკვნები გააკეთეს. იმედია, არჩევნებისთვის მოემზადებიან და ყველაფერი გამოვა. „ოცნებას“ უკვე ბევრი პრობლემა აქვს. ეს პროტესტი შედეგიანია. მთავარი შედეგი იქნება წინ. არჩევნების მოგების შემდეგ საქართველოში ბევრი რამე უნდა შეიცვალოს. პირველ რიგში, უნდა აღდგეს სამართლიანობა. სხვანაირად ნორმალური ქვეყანა არ გვექნება.

მე ძალიან ვგულშმატკივრობ ახალგაზრდებს. იმედი მაქვს, რომ ისინი ააშენებენ ნორმალურ ქვეყანას. ამ აქციებზე ბევრი გამოცდილება მიიღეს. გამოწრთობილებიც არიან, ბევრი უბედურება გადაიტანეს. ამდენ დარბევასა და დაჭერას ბევრ ქვეყანაში ვერ გაუძლებდნენ. საქართველოში გაუძლეს. ეს ახალგაზრდობა იმსახურებს ნორმალურ ქვეყანას _ მისი მომავალი ნათელი უნდა იყოს. რაც არ უნდა თქვას „ოცნებამ“, დათმობაზე მაინც წავა, ბევრი რამე შეიცვლება. ამ ცვლილებებისთვის მზად უნდა იყოს ოპოზიცია. განსაკუთრებით არჩევნებისთვის უნდა მოემზადოს. აუცილებლია, რომ ხალხის მოსმენა ისწავლონ და მათი რჩევებიც გაითვალისწინონ.